35 arday oo badbaday shil dooni oo kadhacay lamu

By Ayanle Dhiire 

35 arday oo wax ka barta dhowr dugsi sare oo kala duwan ayaa ka badbaaday dhacdo halis ah ka dib markii dooni ay la socdeen ay ku dhacday dhagax ku dhow agagaarka dekedda Lamu.
Waxaa sidoo kale la soo badbaadiyay 5 qof oo kale.
Sarkaal ka tirsan hay’adda laanqeyrta Cas ee Kenya Cabdul Xakiim oo dhacdadan xaqiijiyay ayaa sheegay in ardayda ay ka kala yimaadeen xarumo waxbarasho oo kala duwan oo yaalla tuulooyin hoostaga dowlad deegaanka Lamu.
Doonta ayaa lagu soo warramayaa inay ku dhacday dhagax ku yaalla badweynta Hindiya, iyadoo markaas ka dib ay hakad gashay.
Rakaabka ayaa muddo saddex saacadood ah ku xayirnaa goobta, ka hor inta aysan saraakiisha laanqeyrta Cas soo gaarin goobta oo ay soo badbaadiyeen 40-ka qof iyaga oo badqaba.