Qof laguso qabtay hawlgal shalay islii kadhacay oo manta maxkamad laso taagayo

By Ayanle Dhiire 

Waxaa la filayaa in maanta maxkamadda la soo taago qof shalay laga qabtay xaafadda Islii ee deegaanka Kamukunji ee ismaamulka Nairobi.

Laamaha ammaanka ayaa sheegay in shakhsigan uu ku eedeysan yahay ka ganacsiga caanaha kontarabaanka ah.

Shalay ayay ahayd markii xaafadda Islii uu isku dhac ku dhex maray ganacsatada iyo ciidamada ammaanka oo fulinayay howlgal ka dhan ah caanaha budhadha ah.

Muddo saacado ah ayaa waxaa hakad galay howlaha ganacsiga iyo gaadiidka iyadoo ay saraakiisha adeegsanayeen sunta dadka ka ilmeysiisa.

Balse dambi baarayaasha ayaa markii dambe gacanta ku dhigay hal qof oo tuhmane ah iyo dhowr kartoon oo ay ku jiraan caanaha budhadha ah.

Wararka ayaa intaasi ku daraya in dhagaxaan lagu burburiyay labo baabuur oo ay booliisku adeegsanayeen.

Ganacsatada ayaa dhankooda saraakiisha DCI-da ku eedeyay inay bartilmaameedsanayaan ganacsigooda xalaasha ah.

Hasa ahaate , saraakiisha ammaanka ayaa difaacay howlgalka ay shalay ka sameeyeen xaafadda Islii ee deegaanka Kamukunji waxayna ku tilmaameen mid sharci ah.